8 il öncə bu gün Quba rayonunun Xınalıq kəndindən Tufandağı istiqamətində yürüşə çıxan 3 alpinistimiz itkin düşüb.
Cenublu.az məlumat verir ki, “Gilavar” İdman Klubunun üzvləri - əslən Masallı rayonunun Şərəfə kəndindən olan Fəridə Cəbrayılzadə, əslən Astaranın Giləkəran kəndindən olan polis leytenantı Babur Hüseynov və Şəmkir rayonundan olan Namin Bünyatzadə ilə sonuncu əlaqə 24 dekabr 2017-ci il axşam saatlarında saxlanılmışdı.
Axtarışları Dövlət Sərhəd Xidmətinin, Fövqəladə Hallar Nazirliyinin, Ekologiya Nazirliyinin və FAİREX-in (Azərbaycan Hava və Ekstremal İdman növləri Federasiyası) üzvlərindən ibarət komanda həyata keçirmişdi və 2018-ci ilin yanvar ayında axtarışlara Avstriya və Türkiyədən də mütəxəssislər cəlb olunmuşdular.
Axtarışların aparıldığı ərazidə alpinistlərə aid çadırın yeri yalnız 16 may 2018-ci il saat 18:00 radələrində müəyyən edilmişdi və ilkin olaraq 1 kişi meyiti aşkar edilmişdi. Həmin gün 19:00 radələrində isə daha 2 meyit (kişi və qadın) aşkar edilmişdi.
Fəridə Zəbiyulla qızı Cəbrayılzadə Masallı rayonunun Şərəfə kəndində, Babur Hüseynov Astara şəhər qəbiristanlığında, Namin Nizami oğlu Bünyatzadə isə Şəmkir rayonunun Çinarlı qəbiristanlığında atasının yanında dəfn ediliblər.
