Azərbaycan Dəmir Yolları (ADY) QSC-nin sədri Rövşən Rüstəmov və İran Dəmir Yollarının rəhbəri Cabbar Əli Zakeri Sardrudi arasında Tehranda keçirilən Azərbaycan–İran Hökumətlərarası Birgə Komissiyasının iclası çərçivəsində mühüm sənəd imzalanıb.
Cenublu.az ADY-yə istinadən xəbər ver, görüşdə əsas müzakirə mövzusu Astara şəhərində yerləşən yük terminalının fəaliyyətinin genişləndirilməsi olub.
Görüşdə bildirilib ki, Azərbaycan və İran ərazisindəki Astara terminalları, Şimal-Cənub nəqliyyat dəhlizinin strateji potensialını reallaşdırmaqla yanaşı, artan yükaşırma həcmlərinin daha sürətli və effektiv həyata keçirilməsini təmin edəcək. Bu, həmçinin regional ticarətin inkişafına və hər iki ölkənin nəqliyyat infrastrukturunun gücləndirilməsinə böyük imkanlar yaradacaq.
Yeni imzalanan "Astara terminalının tikintisi və istismar müqaviləsinin icrasına dair Strateji Əməkdaşlıq Planı" çərçivəsində Astara terminalının Baş Planı təsdiqlənib. Həmçinin, terminalda tikinti işlərinin 2025-ci ilin sonunadək tamamlanması və yekun investisiyaların müəyyən edilməsi barədə razılığa gəlinib. Bu sənəd 22 yanvar 2025-ci ildə imzalanan 16-cı Hökumətlərarası Birgə Komissiyanın Protokolunun dəmiryol bölməsi əsasında həyata keçiriləcək.
