Ötən ilin sentyabrında Astarada baş vermiş ağır yol-nəqliyyat hadisəsi ilə bağlı məhkəmə prosesi yekunlaşıb.
Belə ki, Çayoba kəndində baş verən hadisədə 1991-ci il təvəllüdlü sürücü Aslan Qasımov bacısı oğlu, 16 yaşlı İgidlə birlikdə "VAZ-2107" markalı avtomobillə toy məclisindən evə qayıdarkən idarəetməni itirib və maşını yol kənarındakı su kanalına aşırıb. Qəza zamanı yeniyetmə avtomobilin ön şüşəsindən çıxaraq yola düşüb və aldığı xəsarətlərdən dünyasını dəyişib.
Mərhumun anası məhkəmədə hadisəni törətmiş qardaşından şikayətçi olmadığını bildirib.
Astara Rayon Məhkəməsinin hökmü ilə Aslan Qasımov Cinayət Məcəlləsinin 263.2-ci maddəsi ilə təqsirli bilinib. Sürücü 1 il 6 ay müddətinə nəqliyyat vasitələrini idarə etmək hüququndan məhrum edilib və 2 il 6 ay müddətinə azadlıqdan məhrumetmə cəzasına məhkum olunub. Cəzanın məntəqə tipli müəssisədə çəkilməsi nəzərdə tutulub.
