Sabirabad rayonunda uzun illər aliment ödəməkdən yayınan şəxs barəsində həbs hökmü çıxarılıb.
Qafqazinfo.az xəbər verir ki, 1984-cü il təvəllüdlü R.Baxışov 2009-cu ildə ailə qurub. Bu nikahdan 2009 və 2010-cu il təvəllüdlü iki övladı dünyaya gəlib. Nikah 2013-cü ildə pozulub, uşaqlar ananın himayəsində qalıb və məhkəmə qərarı ilə onların saxlanılması üçün aylıq 160 manat aliment təyin edilib.
Lakin R.Baxışov illər ərzində aliment ödəməyib və nəticədə 9325 manat borc yaranıb. Bu müddət ərzində o, yenidən ailə qurub və ikinci nikahdan 5 övladı dünyaya gəlib.
Məlumata görə, R.Baxışov keçmiş həyat yoldaşının şikayəti əsasında daha əvvəl 10 gün inzibati qaydada həbs edilib, həmçinin aliment ödəmədiyinə görə 500 manat cərimələnib. Buna baxmayaraq, ödənişlər yenə də həyata keçirilməyib.
Nəticədə R.Baxışov məhkəmə qərarlarını qəsdən icra etmədiyinə görə Cinayət Məcəlləsinin 306-cı maddəsi ilə təqsirli bilinib. Sabirabad Rayon Məhkəməsinin hökmü ilə o, bu dəfə 8 ay müddətinə azadlıqdan məhrum edilib.
