Cəlilabad rayonunun Xudutəpə yaşayış məskənində aparılan arxeoloji qazıntılar nəticəsində çoxlu sayda maddi mədəniyyət nümunələri aşkarlanıb. Bu haqda məlumatı Cenublu.az bu gün, 29 avqust tarixində AzTV-yə istinadən verir.
Eksponatlar eramızdan əvvəl 5-ci minillikdə, yəni eneolit dövründən başlayaraq inkişaf etmiş orta əsrlər dövrünə qədər böyük mərhələni əhatə edir.
Arxeoloji qazıntılar aparılmasında məqsəd Muğan bölgəsinin qədim dövr insanlarının məskunlaşma tarixini öyrənmək və onların Azərbaycan tarixində tutduqları mövqeyi müəyyən etmək olub.
Qazıntılar aparılan ərazidə, həmçinin eramızdan əvvələ aid Parfiya pulu da tapılıb. Müəyyən olunub ki, pul Parfiya hökmdarına aid olub. Bu cür nümunənin tapılması burada parfiyalılarla ticarət əlaqələrinin mövcud olmasını təsdiq edir.
Sahəsi 7 hektara yaxın olan abidəyə ilk dəfə 20-ci əsrin 90-cı illərində arxeoloq Fərman Mahmudov baxış keçirib və onu çoxtəbəqəli yaşayış məskəni kimi qeydə alıb.
Qeyd edək ki, bundan əvvəlki ekspedisiya zamanı bu ərazidə eramızdan əvvəl 8-ci, 7-ci əsrlərə aid nekropol aşkarlanıb. Hazırda abidədə arxeoloji qazıntılar dərin qatlara doğru davam etdirilir.
