Cəlilabad şəhəri, Səttarxan küçəsinin toz və palçıqlı yolu sakinləri narahat edir. Bu haqda məlumatı Cenublu.az bu gün, 24 dekabr tarixində Real TV-yə istinadən verir.
Sakinlər bildiriblər ki, küçə ilə yaşlı, uşaq, səhhətində problem olan bir insan hərəkət edə bilmir. Məcburən avtomobillə getməli olurlar. Lakin çox vaxt avtomobillər belə bu yolda ilişib qalır.
Əsasən, yay və qış aylarında əziyyət çəkən sakinlər bir neçə dəfə qurumlara üz tutublar. Nəticədə yola palçıqla qarışıq çınqıl tökülüb və yolun problemi qismən də olsa həllini tapıb.
Məsələ ilə bağlı kəndin bələdiyyə sədri Mehdi Kərimov bildirib ki, sözügedən küçə ilə yanaşı, Cəlilabad şəhəri ərazisində olan yolların hamısı Cəlilabad şəhər bələdiyyəsi tərəfindən qeydiyyata alınıb. Real vəziyyət müzakirə edilib. Hava şəraiti əlverişli olduqca təmir-bərpa işləri həyata keçiriləcək. Bununla belə, qurumun sədri vətəndaşlara bələdiyyəyə olan əmlak və torpaq borclarını vaxtı-vaxtında ödəmələrini xahiş edib.
