Lənkəran Dövlət Dram Teatrı Əməkdar mədəniyyət işçisi Qəşəm Nəcəfzadənin “İki iyirmi üç arasında” əsəri əsasında eyniadlı tamaşaya quruluş verib. Bu haqda məlumatı Cenublu.az bu gün, 26 oktyabr tarixində verir.
Tamaşada ulu öndər Heydər Əliyevin 1923-2003-cü illər ərzindəki həyat və fəaliyyəti təqdim olunur; onun Azərbaycan xalqının ictimai-siyasi, sosial-kulturoloji həyatındakı rolu, millətimizin özünüdərk prosesi yolundakı fəaliyyəti göz önündə canlandırılır; ulu öndər milli azərbaycançılıq ideologiyasının banisi kimi təqdim edilir. Tamaşanın məqsədi “Heydər Əliyev İli” çərçivəsində ulu öndərin zəngin yaradıcılığını tamaşaçılara və yeni nəslə çatdırmaq, müasir Azərbaycanın qurucusu kimi xalqımızın tarixində oynadığı rolu bir daha nümayiş etdirməkdir.
Tamaşanın quruluşçu rejissoru Emil Əskərov, quruluşçu rəssamı Fuad Babazadə, rəssamı Nərgiz Baxşızadə, geyim üzrə rəssamı Güli Süleymanlı, musiqi tərtibatçısı Vüqar Fərəcov, qrafik dizayneri Fidan Hüseynzadə, videomühəndisi Şəhriyar Camalbəylidir.
Rolları Xalq artisti Qabil Quliyev, Əməkdar artistlər Sücəddin Mirzəyev və Zemfira Nəcəfova, aktyorlar Şarud Mehdiyeva, Aynur Əhmədova, Səyad Əliyev, Miraslan Ağayev, Allahverən Babayev, Qızılgül Quliyeva, Buludxan Buludov, Hikmət Cəfərov, Gülər Kərimova, Rauf Zeynalov, Saleh Əzimzadə, Ayşən Əsədova, Əlirza Şahbazi, Günel Abbaszadə, Emil Rzayev, Aysel Babazadə, Təvəkkül Həsənov, Vəfa Hacızadə, Məleykə Cəfərova və Teymur Hacızadə ifa edirlər.
