Salyan rayonunda ailədaxili münaqişə bıçaqlanma ilə nəticələnib.
1975-ci il təvəllüdlü Cahan şəxsi münasibətlər zəminində yaranan mübahisə zamanı həyat yoldaşı Səmaya bıçaqla xəsarət yetirib.
Məlumata görə, Cahan spirtli içki almaq üçün ailəyə məxsus ev quşlarından bir xoruzu 7 manata satıb və həmin pula araq və siqaret alıb, səhər saatlarında spirtli içki qəbul edib. Səma ərinin araq içməsinə və gizlin xoruz satmasına etiraz edib, bu səbəbdən aralarında mübahisə yaranıb. Mübahisə zamanı Cahan əsəbiləşərək mətbəxdən götürdüyü bıçaqla həyat yoldaşının sol qoluna zərbə endirib.
Xəsarət alan qadın oğluna zəng edərək xəstəxanaya aparılmasını istəyib. Oğlu anasını Salyan Rayon Mərkəzi Xəstəxanasına çatdırıb, həkimlər ona tibbi yardım göstəriblər.
İstintaq zamanı Cahan özünü təqsirli bilib və son zamanlar spirtli içki aludəçisi olduğunu etiraf edib. Zərərçəkmiş Səma isə ərinin uzun müddətdir işsiz olduğunu, daim içki içərək evdə münaqişə yaratdığını, onu təhqir etdiyini deyib. Bildirib ki, ailənin dolanışığını əsasən özü təmin edir.
Məhkəmənin hökmü ilə Cahan Cinayət Məcəlləsinin 128-ci maddəsi ilə təqsirli bilinərək 4 ay müddətinə azadlıqdan məhrum edilib.
Qeyd edək ki, adlar şərtidir.
