Ali Məhkəmədə yol qəzası törətməkdə təqsirləndirilən Daşqın İsgəndərovun kassasiya şikayəti üzrə məhkəmə iclası keçirilib və yekun qərar elan olunub.
İttihama görə, Daşqın İsgəndərov Saatlı Rayon Mərkəzi Xəstəxanasında təcili tibbi yardım avtomobilinin sürücüsü kimi çalışıb. Hadisə 2023-cü ildə Saatlı rayonu ərazisində baş verib. O, xəstəni həkim və feldşer ilə birlikdə xəstəxanaya apararkən "Fiat Doblo" markalı təcili tibbi yardım avtomobili ilə yol qəzası törədib.
Məhkəmə tərəfindən müəyyən edilib ki, sürücü yolun döngəli hissəsində avtomobilə nəzarəti itirib və qarşı istiqamətdə hərəkətdə olan "Hyundai Sonata" markalı avtomobilin hərəkət zolağına çıxaraq toqquşmaya səbəb olub. Qəza nəticəsində bir neçə nəfər xəsarət alıb, xəstə isə vəfat edib.
Saatlı Rayon Məhkəməsinin hökmü ilə ona 5 il müddətinə azadlıqdan məhrumetmə cəzası təyin edilmişdi. Hökmdən dövlət ittihamçısı apellyasiya protesti verib. Şirvan Apellyasiya Məhkəməsinin qərarına əsasən, Saatlı Rayon Məhkəməsinin hökmü dəyişdirilərək məhkumun cəzası 4 il 6 ay müddətinə endirilib.
Ali məhkəmənin qərarına əsasən, Şirvan Apellyasiya Məhkəməsinin qərarı dəyişdirilib. Daşqın İsgəndərovun barəsində "Konstitusiya və Suverenlik İli" münasibətilə amnistiya elan edilməsi haqqında Milli Məclisin 2025-ci il 19 dekabr tarixli Qərarının 2.2-ci bəndi tətbiq edilib. O, azadlıqdan məhrumetmə cəzasından azad olunub.
