Hacıqabulda 23 yaşlı oğlu ilə 16 yaşlı qız üçün toy edən ata hakim qarşısına çıxıb.
Hadisə rayonun Meyniman kəndində baş verib. İttihama görə, 49 yaşlı Eldar Nəcəfov oğlunun evlənməsi üçün həyətlərində toy məclisi təşkil edib. Daxil olan məlumat əsasında polis əməkdaşları məclisə müdaxilə edərək toyu dayandırıblar. Daha sonra Eldar polis şöbəsinə aparılıb və barəsində Cinayət Məcəlləsinin "16 yaşına çatmayan şəxsin erkən evliliyinin təşkili" maddəsi ilə cinayət işi açılıb.
Təqsirləndirilən şəxs məhkəmədə bildirib ki, oğlu üçün qız axtararkən Sabirabadda yaşayan Günay barədə müsbət fikirlər eşidiblər və iki dəfə elçiliyə gediblər. Onun sözlərinə görə, qızın 16 yaşı olduğunu sonradan, molla kəbini üçün sənəd istəniləndə öyrəniblər. Əvvəlcə ailələr arasında narazılıq yaransa da, sonradan toy etmək qərarı verilib. Eldar bildirib ki, digər oğlu ağır xəstədir və qardaşının toyunu görmək istəyib. Ailə də buna görə toy məclisini əvvəlcədən keçirməyə qərar verib.
Təqsirləndirilən şəxs deyib ki, toy zamanı gəlin məclisdə iştirak etməyib və məqsədləri yalnız toy etmək olub. Onun sözlərinə görə, qızı 18 yaşı tamam olduqdan sonra gəlin gətirməyi planlaşdırıblar və qız tərəfi də buna razı olub.
Zərərçəkən Günay isə ifadəsində təqsirləndirilən şəxsə qarşı şikayətinin olmadığını deyib.
Məhkəmənin qərarı ilə Eldar Nəcəfov 1 il müddətinə azadlığın məhdudlaşdırılması cəzasına məhkum edilib. Ad və soyadlar şərtidir.
