Xəbər verdiyimiz kimi, 10 günün əsgəri olan Masallı sakini Coşqun Zülfüqar oğlu Sadıqov Mərkəzi Klinik Hərbi Hospitalında dünyasını dəyişib.
Cenublu.az xəbər verir ki, Müdafiə Nazirliyinin əsgəri Coşqunun vərəm xəstəsi olduğu iddia olunub.
Bu barədə hərbi bloqer Tofiq Şahmuradov feysbukda paylaşıma rəy yazıb.
Onun sözlərinə görə, Coşqun atasız olub, özü də vərəmdən əziyyət çəkirmiş.
"Rəhmətə gedən əsgərin yaxınları bir az öncə mənimlə əlaqəyə çıxdılar. Atası yoxdur, anası böyüdüb. 25 yaşı olub, ağır vərəm xəstəsi imiş. Bir neçə dəfə xəstəliyinə görə həyati təhlükə yaşayıb və bu səbəbdən 7 il hərbi xidmətə aparılmayıb.
Buna baxmayaraq, yanvar çağırışının son günlərində qəfil hərbi xidmətə göndərilib. Belə ağır vərəm xəstəsi yüzlərlə əsgərin içinə necə göndərilib? Bu, orduya qarşı böyük təxribatdır, vərəm xəstəliyi keçicidir. İnsanlar yoluxa bilər. Əsgər xidmətə gedəndən 4-5 gün sonra vəziyyəti ağırlaşıb, xəstəxanada vəfat edib," – deyə o bildirib.
Məsələ ilə bağlı Səfərbərlik və Hərbi Xidmətə Çağırış üzrə Dövlət Xidmətinin İctimaiyyətlə İş və Beynəlxalq Əlaqələr şöbəsinin rəisi Pərviz Sədrəddinov Cenublu.az-a açıqlama verib.
"Hazırda sözügedən məsələ ilə bağlı cinayət işi başlanıb və istintaq aparılır. İstintaqın yekununda hüquq-mühafizə orqanları tərəfindən məsələyə hüquqi qiymət veriləcək," - deyə bildirib.
Qeyd edək ki, Quru Qoşunlarında xidmət edən Coşqun Sadıqov vəfatından 10 gün əvvəl - yanvarın 26-da hərbi xidmətə gedibmiş.
