Saatlı rayonunun Musalı kəndində baş verən hadisəyə görə təqsirləndirilən 2002-ci il təvəllüdlü Cəfər Tağıyevin cəzası ağırlaşdırılıb.
İstintaqla müəyyən olunub ki, Cəfər əvvəllər sevgi münasibətində olduğu həmkəndlisinin onun barəsində verdiyi şikayəti geri götürməsinə nail olmaq üçün gecə saatlarında qızın nənəsinin evinə gedib. Darvazanın bağlı olduğunu görən gənc hasardan aşaraq həyətə daxil olub, qapını döysə də, açmayıblar.
Bundan sonra o, evin pəncərəsini sındıraraq qanunsuz şəkildə mənzilə girib. Cəfər özü ilə gətirdiyi mətbəx bıçağı ilə qızın 1954-cü il təvəllüdlü nənəsi Səmayə Səfərzadəyə nəvəsinin gözü qarşısında çoxsaylı zərbələr endirib.
Daha sonra təqsirləndirilən şəxs mətbəxə qaçaraq gizlənmək istəyən digər nəvə Samirə Səfərzadəyə hücum edib. O, gənc qadını yumruq və təpiklə döyüb, yerə yıxdıqdan sonra qolunu buraraq sındırıb. Ekspertiza yetirilən xəsarətləri sağlamlığın uzun müddət pozulmasına səbəb olan az ağır xəsarət kimi qiymətləndirib.
Cəfər Tağıyev xuliqanlıq niyyətilə qəsdən sağlamlığa az ağır və yüngül zərər vurma, həmçinin mənzil toxunulmazlığını pozma maddələri ilə təqsirli bilinib. Saatlı Rayon Məhkəməsinin 2 il 2 ay 27 günlük həbs hökmündən verilən protestə baxan Şirvan Apellyasiya Məhkəməsi cəzanı artıraraq ona 3 il müddətinə azadlıqdan məhrumetmə cəzası təyin edib.
Adlar və soyadlar şərtidir.
Mənbə: Pravda.az
