Bakıda sevgi münasibəti üstündə dava məhkəmə ilə nəticələnib.
1993-cü il təvəllüdlü Yardımlı rayon sakini Almaz sevgilisilə münasibətdə olduğunu düşündüyü Zülfiyyəyə xəsarət yetirib. Hadisə Zülfiyyəyə məxsus "Mercedes-Benz" markalı avtomobildə baş verib.
Almaz ifadəsində bildirib ki, qeyri-rəsmi yaşadığı kişiyə görə Zülfiyyəni dəfələrlə xəbərdar edib. Hadisə günü isə Lökbatan qəsəbəsində uşaqlarını parka apararkən sevgilisini Zülfiyyənin avtomobilində görüb. Kişi maşından düşdükdən sonra Almaz avtomobilə daxil olaraq Zülfiyyəni vurub. Nəticədə qadın müxtəlif bədən xəsarətləri alıb.
Zərərçəkmiş Zülfiyyə isə bildirib ki, Mahmud onu atası ilə tanış etmək üçün Lökbatana gətirib. Onlar avtomobildə söhbət edərkən Mahmud maşından düşüb, bundan sonra Almaz avtomobilə girərək onu döyüb. Hadisə zamanı avtomobilin sağ güzgüsü də qırılıb.
Almaz törətdiyi əməldən peşman olduğunu bildirib və himayəsində iki azyaşlı övladının olmasını nəzərə alaraq amnistiya tətbiq edilməsini istəyib. Zərərçəkən isə onun cəzalandırılmasını tələb edib.
Qaradağ Rayon Məhkəməsi Almaz barəsində amnistiya aktı tətbiq edərək cinayət təqibinə xitam verib və onu cinayət məsuliyyətindən azad edib.
Adlar şərtidir.
Mənbə: demokrat.аz
