Şirvan şəhərində 28 yaşlı kişi arvadına xəsarət yetirib. Hadisə ötən ilin sentyabrın 3-də, saat 23 radələrində baş verib. Sabirabad rayon sakini, 1998-ci il təvəllüdlü Xəlil sərxoş vəziyyətdə yaşadığı evdə həyat yoldaşı Səidə ilə mübahisə edib.
Mübahisə zamanı Xəlil arvadını yumruq və təpik zərbələri ilə döyərək ona müxtəlif dərəcəli xəsarətlər yetirib. İstintaq zamanı o, ittiham üzrə özünü təqsirli bilib.
Xəlil ifadəsində bildirib ki, Səidə ilə 2019-cu ildə rəsmi nikaha daxil olub və onların bir övladı var. Onun sözlərinə görə, hadisə günü işdən sonra spirtli içki qəbul edib və gecə saatlarında evə gəlib: "Evdə yalnız mən və arvadım var idi. Səidə içkili gəlməyimə görə irad bildirməyə başladı. Mən də əsəbiləşdim və aramızda mübahisə yarandı. Mübahisə getdikcə şiddətləndi. Bu zaman əsəblərimi cilovlaya bilmədim və Səidəni vurdum ki, sakitləşsin".
O qeyd edib ki, vəziyyət daha da gərginləşdiyi üçün sonradan heç nə demədən evi tərk edib.
Xəlilin əməli təsdiqini tapsa da, məhkəmə qərarı ilə onun barəsində Milli Məclisin 19 dekabr 2025-ci il tarixli amnistiya aktı tətbiq olunub. Cinayət-Prosessual Məcəlləsinin 43.3-cü maddəsinə əsasən cinayət təqibinə xitam verilib və o, məsuliyyətdən azad edilib.
Qeyd edək ki, adlar şərtidir.
