Sabirabad sakini, 1997-ci il təvəllüdlü Sənan saytda saxta elan yerləşdirərək dələduzluq edib. O, 2025-ci ilin iyun ayında ev quşu satışı adı ilə elan paylaşaraq Oğuz rayon sakini Əhmədi aldadıb. Sənan əvvəlcə hər biri 7 manat olmaqla 150 ədəd hind quşu satacağını bildirib, daha sonra isə 1148 manat müqabilində 190 ədəd quş verəcəyinə dair yalan vəd verib.
Əhməd buna inanaraq həmin məbləği onun bank kartına köçürüb. Sənan isə pulu ələ keçirərək vədinə əməl etməyib.
Ona qarşı Cinayət Məcəlləsinin 178.1-ci maddəsi (dələduzluq) ilə ittiham irəli sürülüb. Oğuz Rayon Məhkəməsinin hökmü ilə Sənan 1 il 28 gün müddətinə azadlığın məhdudlaşdırılması cəzası alıb.
Cəza müddətində ona gecə saat 23:00-dan səhər 07:00-dək evdən çıxmaq, həmçinin Sabirabad rayonunun hüdudlarını tərk etmək qadağan edilib. Bundan əlavə, o, elektron nəzarət vasitəsi daşımalı, yaşayış yerini məhkəmə icazəsi olmadan dəyişməməli və iş yerində dəyişiklik olarsa əvvəlcədən məlumat verməlidir.
Qeyd edək ki, adlar şərtidir.
