İki dost arasında yaranan mübahisə dava ilə nəticələnib.
Salyan rayon sakini, 2005-ci il təvəllüdlü Zaman paytaxtda restoranda ofisiant işləyib. Onun həmkarı və dostu Ariflə aralarında şəxsi münasibətlər və pul borcu səbəbindən mübahisə yaranıb. Mübahisə zamanı Zaman dostunun sifətinə yumruqla bir neçə zərbə vuraraq ona xəsarət yetirib.
Faktla bağlı Zamana Cinayət Məcəlləsinin 128-ci maddəsi ilə ittiham verilib. Məhkəmədə o, təqsirini qəbul edib, törətdiyi əmələ görə peşman olduğunu, zərərçəkmişlə barışdığını və dəymiş zərəri ödədiyini bildirib.
Arif də məhkəmədə Zamanla barışdığını, ona qarşı şikayət və tələbinin olmadığını deyib. Məhkəmə tərəflərin barışmasını və ziyanın tam ödənilməsini nəzərə alaraq Zamanı cinayət məsuliyyətindən azad edib və cinayət təqibinə xitam verib.
Adlar şərtidir.
Mənbə: demokrat.аz
