42 yaşlı Saatlı sakini həyat yoldaşına xəsarət yetirib.
Demokrat.аz xəbər verir ki, Valeh həyat yoldaşı Mahirə ilə ailə-məişət zəminində yaranan mübahisə zamanı ona yumruq və təpiklə zərbələr endirib.
Təqsirləndirilən şəxs ifadəsində bildirib ki, 2003-cü ildə ailə həyatı qurduğu həyat yoldaşı ilə aralarında əvvəllər də qısqanclıq səbəbindən mübahisələr olub. Onun sözlərinə görə, hadisə günü içkili vəziyyətdə evə gələrək arvadından işdən çıxdıqdan sonra hara getdiyini soruşub. Bu zaman Mahirə Valehə kobud şəkildə cavab verib və tərəflər arasında mübahisə yaranıb.
Valeh bildirib ki, dava zamanı həyat yoldaşının üz, baş və bədən nahiyələrinə zərbələr endirib. Onun sözlərinə görə, həmin vaxt evdə onlardan başqa heç kim olmayıb və bu vəziyyət 7-8 dəqiqə davam edib.
Xəzər Rayon Məhkəməsinin hökmü ilə Valeh 6 ay müddətinə azadlığın məhdudlaşdırılması cəzasına məhkum edilib.
Qeyd edək ki, adlar şərtidir.
