Ali Məhkəmədə qəsdən sağlamlığa az ağır zərər vurma və torpaq sahəsini özbaşına tutmada təqsirləndirilən Cavid Həsənovun barəsindəki qərardan verilən kassasiya şikayətinə baxılıb.
İttihama görə, Cavid 2015-ci ildən Lənkəranın Boladi kəndində özünə məxsus torpaq sahəsinə bitişik olan və bələdiyyənin istifadəsindəki 4,48 hektar kənd təsərrüfatı təyinatlı torpaq sahəsini qanunsuz zəbt edib. Bildirilir ki, o, həmin ərazini tikanlı məftillə hasarlayaraq kartof, buğda, arpa, qarğıdalı və çiyələk əkib-becərib.
Bundan başqa, 2022-ci ildə kənddə su kanalının kənarında həmkəndlisi ilə yaranan mübahisə zamanı qarşı tərəfi itələyərək yerə yıxıb. Nəticədə zərərçəkmiş şəxs qolundan sınıq xəsarəti alıb və ekspertiza bunu sağlamlığın uzun müddət pozulmasına səbəb olan az ağır xəsarət kimi qiymətləndirib.
Lənkəran Rayon Məhkəməsi onu hər iki maddə ilə təqsirli bilərək 3 il 6 ay müddətinə azadlığın məhdudlaşdırılması cəzasına məhkum edib.
Daha sonra Şirvan Apellyasiya Məhkəməsi sağlamlığa az ağır zərər vurma epizodu üzrə bəraət verib, lakin torpaq sahəsini özbaşına tutma maddəsi üzrə cəzanı qüvvədə saxlayıb. Nəticədə yekun cəza 2 il 11 ay 26 gün müəyyən olunub.
Sonradan isə "Konstitusiya və Suverenlik İli" münasibətilə elan olunan amnistiya aktı əsasında o, cəzadan azad edilib.
Müdafiə tərəfi yekun qərardan narazı qalaraq kassasiya şikayəti versə də, Ali Məhkəmə şikayəti təmin etməyib.
Ad və soyad şərtidir.
