Saatlı rayonunda qohumlar arasında borc üstündə yaranan mübahisə cinayət işi ilə nəticələnib. Hadisə ötən ilin fevralın 28-də Mustafabəyli kəndində baş verib.
1965-ci il təvəllüdlü Əkbər axşam saatlarında yaşadığı evin həyətində qohumu Cavadla qarşılaşıb. Cavad Əkbərdən ona borclu olduğu pulu tələb edib. Bu səbəbdən aralarında şəxsi münasibətlər zəminində mübahisə yaranıb. Mübahisə zamanı tərəflər bir-birlərinə nalayiq ifadələr işlədiblər və dava başlayıb.
Dava zamanı Əkbər yerdən götürdüyü taxta parçası ilə qohumunun sol qoluna və qabırğa nahiyəsinə bir neçə zərbə endirib. Nəticədə Cavad xəsarət alıb.
Hadisədən sonra Əkbərə qarşı Cinayət Məcəlləsinin 128-ci — qəsdən sağlamlığa zərər vurma maddəsi ilə ittiham irəli sürülüb. Məhkəmədə ifadə verən Əkbər özünü təqsirli bilib, əməlindən peşman olduğunu deyib. O, zərərçəkmişdən üzr istədiyini və aralarında barışıq əldə olunduğunu bildirib.
Zərərçəkmiş Cavad da Əkbər ilə barışdığını, ondan heç bir şikayət və tələbinin olmadığını qeyd edib.
Cinayət işinə Saatlı Rayon Məhkəməsində baxılıb. Məhkəmə tərəflərin barışmasını və zərərçəkmişin şikayətinin olmamasını nəzərə alaraq, Əkbərin barəsində cinayət təqibinə xitam verib. O, cinayət məsuliyyətindən azad edilib.
Qeyd edək ki, adlar şərtidir.
