Ali Məhkəmədə "Nicat Lənkəranski" ləqəbi ilə tanınan Nicat Əkbərovun öldürülməsinə cəhdlə bağlı Şahmar İsmayılov, Vüqar Quliyev və Ramal Məmmədovun kassasiya şikayəti üzrə məhkəmə iclası başa çatıb.
İstintaqa görə, Şahmar İsmayılov, Vüqar Quliyev və Ramal Məmmədov qrup halında Nicat Əkbərovu sifarişlə öldürmək məqsədilə odlu silahdan atəş açıblar. Nicat Əkbərov atəşdən yayınsa da, hadisə yerində olan Tamerlan Hüseynov və Fəqan Rəhimli xəsarət alıblar.
Toplanmış sübutlar əsasında onlara Cinayət Məcəlləsinin bir neçə maddələrilə ittiham irəli sürülüb.
Nicat Əkbərov 1983-cü ildə Lənkəranda doğulub və əvvəllər məhkum olunub. Bakı Ağır Cinayətlər Məhkəməsi hökmü ilə Şahmar İsmayılov 13 il 6 ay, Vüqar Quliyev 12 il 6 ay, Ramal Məmmədov isə 12 il müddətinə azadlıqdan məhrum edilib. Ali Məhkəmə şikayəti təmin etməyib.
