Lənkəran Ağır Cinayətlər Məhkəməsində əmisini öldürməkdə təqsirləndirilən Elşən Hüseynzadənin cinayət işi üzrə məhkəmə prosesi başa çatıb.
İttihama görə, hadisə Lənkəranın Vilvan kəndində baş verib. Kənd sakinləri Vəliağa Səbziyev və qardaşı Hüseynqulu ata evində yaşayıblar. Ataları vəfat etdikdən sonra Vəliağa özü üçün ayrıca ev tikdirsə də, ata evini də miras kimi öz adına rəsmiləşdirib. Buna baxmayaraq, Hüseynqulu və ailəsi həmin evdə qalmaqda davam edib.
Bir müddət sonra qardaşlar arasında münasibətlər gərginləşib. Vəliağa qardaşının ailəsindən ata evini tərk etməyi tələb edib. Lakin gedəcək başqa yerləri olmadığı üçün onlar evdən çıxmayıblar. Mübahisələr getdikcə kəskin xarakter alıb.
Ötən il mayın 29-da Hüseynqulunun oğlu Elşən Hüseynzadə əmisi Vəliağanı öldürmək qərarına gəlib. O, evdən mətbəx bıçağı götürərək axşam saatlarında kəndin örüş sahəsinə yollanıb.
Vəliağa heyvanlarını aparmağa gəldikdə Elşən onun qarşısını kəsərək mülkdən əl çəkməsini tələb edib. Tərəflər arasında yaranan mübahisə zamanı Elşən əmisi Vəliağaya 15 bıçaq zərbəsi vuraraq onu qətlə yetirib.
Hadisədən dərhal sonra Elşən rayon ərazisini tərk edərək Bakıya gəlib. Polis əməkdaşlarının keçirdiyi əməliyyat-axtarış tədbirləri nəticəsində o, hava limanında saxlanılıb və istintaqa təhvil verilib.
Məhkəmənin hökmü ilə Elşən Hüseynzadə 17 il müddətinə azadlıqdan məhrum edilib.
