Astaralı Əməkdar müəllim Heybət Hüseynovun ali təhsilə gedən yolu çətinliklərdən keçib. Ailəsinin maddi imkanı çatmadığı üçün instituta bir il gec daxil olub, həmin müddətdə Pioner Evində işləyib. Tələbəlik illərini isə belə xatırlayıb:
"Bir il instituta qaloşla getdim. Əynimə atamın sırıqlısını geyinirdim".
Coğrafiya müəllimliyi üzrə təhsilini başa vurduqdan sonra Astaraya qayıdıb. İlk iş yeri Suparibar kənd məktəbi olub. Daha sonra vaxtilə şagirdi olduğu məktəbdə dərs deyib, coğrafiya kabineti və meydançası yaradıb.
Onun tədris üsulları diqqət çəkib və 1962-ci ildə Moskvada qabaqcıl müəllimlərin ümumittifaq toplantısında iştirak edib. 1980-ci ildə isə doğma məktəbinə — Astara şəhər M.Ə.Sabir adına 1 nömrəli məktəbə direktor kimi qayıdıb.
2007-ci ildə "Əməkdar müəllim" fəxri adına layiq görülüb. Uzun illər yetişdirdiyi şagirdlər arasında sonradan müəllim olanlar, xaricdə çalışıb yaşayanlar da var.