Masallı rayonunun Qızılağac kənd sakini Kamilə Bağışzadə iki azyaşlı övladını qəsdən öldürməkdə təqsirli bilinib.
Gununsesi.info məlumat verir ki, istintaq materiallarına görə, 26 yaşlı qadın 2025-ci ilin yanvarında 1 aylıq oğlu Mülayimə evdə sirkə turşusu içirib. Uşaq ağır vəziyyətdə xəstəxanaya çatdırılsa da, həyatını xilas etmək mümkün olmayıb. Həmin vaxt ölüm səbəbi xəstəlik kimi qiymətləndirilib və körpə dəfn edilib.
Bir il sonra, 2026-cı ilin yanvarında Kamilə Bağışzadə 5-ci övladını dünyaya gətirib. O, ifadəsində bildirib ki, körpənin qız olduğunu öyrəndikdən sonra ərinin narazı qalacağını düşünərək xəstəxanada uşağı boğub. Qadın daha sonra tibb işçilərinə körpənin qəfil pisləşdiyini desə də, ekspertiza onun boğularaq öldürüldüyünü müəyyən edib.
Bu hadisədən sonra ilk uşağın meyiti də ekshumasiya edilərək ekspertizadan keçirilib.
Kamilə Bağışzadə ifadəsində hər iki hadisəni maddi çətinliklər və ərinin uşaqlara münasibəti ilə əlaqələndirib. Həyat yoldaşı Qadir Bağışov isə qız övladlarını istəməməsi barədə iddiaları təkzib edib, ailəsini imkanları daxilində dolandırmağa çalışdığını bildirib.
Lənkəran Ağır Cinayətlər Məhkəməsinin hökmü ilə Kamilə Bağışzadə köməksiz vəziyyətdə olan iki şəxsi qəsdən öldürməkdə təqsirli bilinərək 17 il müddətinə azadlıqdan məhrum edilib.
