Lerik rayonunda 56 yaşlı Telman bacısı oğlu Rüfəti bıçaqladığı üçün cinayət məsuliyyətinə cəlb edilib.
İstintaqla müəyyən edilib ki, Telman bacısı oğlu Rüfətlə qardaşı qızı Günel arasında yaxın münasibət olduğundan şübhələnib. Hadisə günü o, yaşadıqları kənd ərazisində "Uzun dirsək" adlanan sahədə Rüfətlə görüşərək bu məsələni aydınlaşdırmaq istəyib. Rüfət Günellə yalnız qohumluq münasibətlərinin olduğunu deyib. Bu zaman tərəflər arasında mübahisə yaranıb və Telman üzərində gəzdirdiyi bıçaqla onun kürəyinə bir dəfə zərbə vurub.
Məhkəmədə Telman özünü qismən təqsirli bilərək bildirib ki, əsəbi olduğu üçün bu hərəkəti edib. O, hadisədən sonra evinə qayıdıb, daha sonra polis əməkdaşları tərəfindən şöbəyə aparılıb və şübhələrinin təsiri altında hərəkət etdiyini etiraf edib.
Zərərçəkmiş Rüfət də ifadəsində dayısının ona Günellə münasibəti barədə sual verdiyini, cavabından sonra əsəbiləşərək bıçaqla vurduğunu deyib. Yaralanan Rüfət hadisə yerindən uzaqlaşaraq yaxınlarının köməyi ilə xəstəxanaya çatdırılıb.
Lerik Rayon Məhkəməsi Telmana qarşı "Konstitusiya və Suverenlik ili" münasibətilə elan olunmuş amnistiya qərarını tətbiq edib. Nəticədə o, cinayət məsuliyyətindən azad olunub, iş üzrə icraata xitam verilib və barəsindəki qətimkan tədbiri ləğv edilib.
