Bakı Ağır Cinayətlər Məhkəməsində adam oğurluğunda ittiham olunan dəstə üzvləri barədə hökm oxunub. Proses hakim Leyla Məmmədova-Əsgərovanın sədrliyi ilə keçirilib. Təqsirləndirilən şəxslər məhkəmə zalında iştirak etməkdən və son söz deməkdən imtina ediblər, bu barədə akt tərtib olunub.
Hadisə Sabunçunun Zabrat qəsəbəsində baş verib. Qəsəbə sakini Nəzirxan Ağaxanov "TikTok"da "Nəzirxan qanuni oğruların dədəsi" adlı hesab açaraq kriminal aləmdə "Rövşən Caniyev" kimi tanınan mərhum barədə xoşagəlməz paylaşımlar edib. Bu paylaşımlardan sonra bir qrup şəxs onu cəzalandırmaq qərarına gəlib.
İttihama görə, Şücaət Rzayev tanışı Elsevər Əhmədovun sifarişi ilə digərləri ilə birlikdə plan quraraq Ağaxanovu aldadıb Zabratda görüşə çağırıb. Onu yük avtomobilinin yük yerinə salaraq əl-qolunu və gözlərini yapışqan lentlə bağlayıblar və yaşadığı evə aparıblar. Daha sonra kəsici-deşici alətlərlə xəsarətlər yetirib həyətlərindəki toyuq hinində saxlayıblar. Ondan üzr istəməsini tələb edib üzr videosunu sosial şəbəkələrdə yayıblar.
Faktla bağlı Cinayət Məcəlləsinin adam oğurluğu və digər maddələrlə cinayət işi açılıb, 7 nəfər həbs edilib. Məhkəmənin hökmünə əsasən, Şücaət Rzayev 10 il, Səlim Əliyev, Samir Hüseynov, Müştəba Əliyev və Təbriz Əliyev 8 il 6 ay azadlıqdan məhrum ediliblər. Murad Rzayev və Əhməd Əzizova isə 2 il sınaq müddəti təyin olunmaqla şərti cəza verilib.
