Yol qəzası törədərək hadisə yerindən qaçmaqda təqsirləndirilən Murad Abdullazadə ilə bağlı qərardan kassasiya şikayəti verilib.
İttihama görə, hadisə 2023-cü il iyunun 6-da Lənkəran-Boradigah-Masallı yolunun Vilvan kəndindən keçən ərazisində baş verib. Murad Abdullazadə idarə etdiyi "Khazar SD" markalı avtomobillə Lənkəran istiqamətində hərəkətdə olarkən yolu keçən 1967-ci il təvəllüdlü Hüseyn Əliyevi vurub. İstintaq müəyyən edib ki, sürücünün piyadanı vaxtında görərək avtomobili saxlamaq imkanı olsa da, o, hərəkəti davam etdirib. Nəticədə Hüseyn Əliyev ağır xəsarətlər alıb və travmatik, hemorragik şokdan vəfat edib.
Məhkəmə həmçinin müəyyən edib ki, Murad Abdullazadə qəza sonrası avtomobili saxlamayıb, təcili yardım çağırmayıb, zərərçəkənə kömək göstərməyib və hadisə yerindən qaçıb.
Lənkəran Rayon Məhkəməsi onu 4 il azadlıqdan və 2 il sürücülük hüququndan məhrum edib. Şirvan Apellyasiya Məhkəməsi əlavə cəzanı 2 il 3 aya qaldırıb. Daha sonra amnistiya tətbiq olunaraq həbs müddəti 3 il 6 aya endirilib.
