Şirvan Apellyasiya Məhkəməsində yol-nəqliyyat hadisəsi törədərək hadisə yerindən qaçmaqda təqsirləndirilən Murad Abdullazadə ilə bağlı qərar elan olunub. Dövlət ittihamçısının apellyasiya protesti təmin edilib, təqsirləndirilən şəxsin və zərərçəkmiş tərəfin şikayətləri isə təmin olunmayıb.
Hadisə 2023-cü il iyunun 6-da saat 22:10 radələrində Lənkəran–Boradigah–Masallı avtomobil yolunun Lənkəran rayonunun Vilvan kəndi ərazisindən keçən hissəsində baş verib. Murad Abdullazadə idarə etdiyi "Khazar SD" markalı avtomobillə yolu keçən, 1967-ci il təvəllüdlü Vilvan kənd sakini Hüseyn Əliyevi vurub.
İstintaqla müəyyən edilib ki, sürücünün avtomobili vaxtında dayandırmaq imkanı olsa da, o, hərəkəti davam etdirərək piyadanı vurub. Nəticədə Hüseyn Əliyev aldığı ağır xəsarətlərdən dünyasını dəyişib.
Bundan əlavə, sürücü qəza yerində dayanmayıb, təcili yardım çağırmayıb və aidiyyəti orqanlara məlumat vermədən hadisə yerindən uzaqlaşıb.
Birinci instansiya məhkəməsi onu 4 il azadlıqdan məhrum etmişdi. Apellyasiya mərhələsində isə hökm qismən dəyişdirilib.
Qərara əsasən, Lənkəran Rayon Məhkəməsinin hökmü cəza hissəsində dəyişdirilib. Murad Abdullazadəyə 2 il 3 ay müddətinə nəqliyyat vasitələrini idarə etmək hüququndan məhrumetmə cəzası təyin edilib. "Konstitusiya və Suverenlik İli" ilə bağlı amnistiya qərarına əsasən isə ona verilmiş 4 il azadlıqdan məhrumetmə cəzası 6 ay azaldılıb və üzərində qəti olaraq 3 il 6 ay azadlıqdan məhrumetmə cəzası saxlanılıb.
