Kredit götürmək istəyən vətəndaşın 450 manatı mənimsənilib.
Lənkəran rayonu, Liman şəhər sakini Ramal Əliyev dələduzluqla üzləşdiyini iddia edir.
Xezerxeber.az xəbər verir ki, zərərçəkmiş deyir ki, ona "ƏhatsApp" vasitəsilə zəng edilərək kredit kampaniyasına düşdüyü və adına 6000 manat kredit ayrıldığı bildirilib.
Ramal Əliyev deyir ki, ilkin olaraq onunla bir qadın, daha sonra isə kişi danışaraq kreditin rəsmiləşdirilməsi üçün sığorta və depozit ödənişi edilməli olduğu bildirilib.
Fırıldaqçıların toruna düşən Ramal Əliyevin sözlərinə görə, sonradan ona kreditin artıq təsdiqləndiyi deyilib və hesabına vəsait köçürüləcəyi vəd edilib. Ancaq vətəndaş sonradan aldadıldığını bilib.
Çəkiliş apardığımız zaman Ramal Əliyev bir neçə dəfə qarşı tərəfə zəng etsə də, bütün cəhdləri nəticəsiz qaldı, cavab verən olmadı.
Məsələ ilə bağlı Daxili İşlər Nazirliyinin Mətbuat xidmətinin Lənkəran regional qrupundan bildirilib ki, vətəndaşın müraciəti əsasında hazırda müvafiq polis orqanında araşdırma aparılır: "Bir daha vətəndaşlara internet resurslarındakı saxta cəlbedici təkliflərə və şirnikləndirici vədlərə qarşı diqqətli olmaları tövsiyyə olunur".
Xezerxeber.az mövzu ilə bağlı daha ətraflı videomaterialı təqdim edir.
