Biləsuvar rayonunda kafedə telefonu enerji mənbəyinə qoşmaq üstündə yaranan mübahisə cinayət işi ilə nəticələnib.
Hadisə rayonun Xırmandalı kəndində yerləşən kafedə baş verib. Zərərçəkmiş şəxs telefonunu enerji mənbəyinə qoşmaq üçün kafeyə daxil olub. Bu zaman kafedə çalışan qadın 2 manat ödəniş tələb edib.
Məlumata görə, zərərçəkmiş buna etiraz edərək, həmin xanıma kobud şəkildə cavab verib. Bu zaman kafedə olan 2003-cü il təvəllüdlü Xəyal onunla mübahisəyə başlayıb. Mübahisə qısa zamanda davaya çevrilib və gənc qarşı tərəfə bir neçə yumruq zərbəsi endirib.
Biləsuvar Rayon Məhkəməsinin hökmü ilə Xəyal 6 ay müddətinə azadlığın məhdudlaşdırılması cəzasına məhkum edilib. Hökmə əsasən, o, gecə saatlarında yaşayış yerini tərk edə bilməyəcək, həmçinin məhkəmənin icazəsi olmadan Biləsuvar rayonunun inzibati ərazisini tərk etməsi qadağan olunub.
Mənbə: demokrat.аz
