İmişlidə 21 yaşlı oğlan tanışını bıçaqladığına görə məhkəmə qarşısına çıxıb.
Hadisə şəhərin Heydər Əliyev adına parkında baş verib. 2005-ci il təvəllüdlü Sərxan "TikTok"da yaranan mübahisəni aydınlaşdırmaq üçün Nurlanla görüşə gedib. Həmin görüşdə həm onun, həm də Nurlanın dostu olan Ramal da iştirak edib.
Sərxanın sözlərinə görə, Nurlanla barışdıqdan sonra Ramalla arasında mübahisə yaranıb. O bildirib ki, Ramal əvvəlcə kəmərinin dəmir hissəsi ilə başına zərbə vurub. Bundan sonra isə əvvəlcədən gizlətdiyi mətbəx bıçağı ilə Ramalı sol böyründən bir dəfə vurub.
Hadisədən sonra Sərxan əmisi oğlu ilə birlikdə taksi ilə Bakıya getsə də, polis əməkdaşlarının zəngindən sonra geri qayıdaraq könüllü təslim olub. O, məhkəmədə əməlindən peşman olduğunu, zərərçəkənlə barışdığını, atasının vəfat etdiyini, anasının xəstə, bacısının isə tələbə olduğunu deyərək yüngül cəza istəyib.
Ramal isə ifadəsində Sərxanla Nurlanı barışdırmaq üçün görüşə gəldiyini, mübahisə zamanı əvvəlcə kəmərlə Sərxana zərbə endirdiyini, daha sonra isə Sərxanın gizlətdiyi bıçaqla onu döş qəfəsi nahiyəsindən vurduğunu bildirib.
Məhkəmə Sərxanı qəsdən sağlamlığa ağır zərər vurmaqda təqsirli bilərək ona 4 il azadlıqdan məhrumetmə cəzası təyin edib. Lakin cəza 2 il sınaq müddəti ilə şərti hesab olunub.
Adlar şərtidir.
Mənbə: demokrat.az
