Şirvan Apellyasiya Məhkəməsində qəsdən sağlamlığa ağır zərər vurmaqda təqsirləndirilən İlqar Əskərovun barəsindəki hökmdən verilən apellyasiya şikayətinə baxılıb. Hakim Pərviz Hacıyevin sədrliyi ilə keçirilən prosesdə şikayət təmin edilməyib və 5 illik həbs cəzası qüvvədə saxlanılıb.
İttihama görə, hadisə 2025-ci ildə saat 21 radələrində Masallı rayonunun Şatıroba kəndində baş verib. İlqar Əskərov qardaşından telefonla həmkəndlisi Faiq Babayevin onun ünvanına nalayiq ifadələr işlətdiyini eşidib. Bundan sonra Faiqin məscidin qarşısında olduğunu öyrənərək ora gedib.
İlqar Faiqin həqiqətən belə ifadələr işlədib-işlətməsini dəqiqləşdirmədən onun üzərinə hücum edib. Mübahisə zamanı zərərçəkmiş şəxsin başına yumruqla zərbə vurub. Faiq müvazinətini itirərək asfaltın üzərinə yıxılıb.
Nəticədə o, açıq kəllə-beyin travması, beyin əzilməsi, ənsə sümüyünün sınığı və kəllədaxili qansızma daxil olmaqla ağır xəsarətlər alıb. Ekspertiza bu xəsarətlərin həyat üçün təhlükəli olduğunu müəyyən edib.
Lənkəran Ağır Cinayətlər Məhkəməsi İlqar Əskərovu Cinayət Məcəlləsinin 126.1-ci maddəsi ilə təqsirli bilərək 5 il müddətinə azadlıqdan məhrum edib. Şirvan Apellyasiya Məhkəməsi isə hökmü dəyişmədən saxlayıb.
Ad və soyad şərtidir.
Mənbə: pravda.аz
