Biləsuvar rayonunda ər-arvadın mübahisəsi cinayətlə nəticələnib.
Biləsuvar rayonunun kəndlərindən birində ər-arvad mübahisəsi cinayət işi ilə nəticələnib. 1987-ci il təvəllüdlü Fərid həyat yoldaşı Sevillə mübahisə edib. Münaqişəyə səbəb isə Sevilin ərinin spirtli içki almasının qarşısını almaq üçün kənddəki mağazalara gedərək ona içki satılmamasını xahiş etməsi olub.
Bu məsələ üstündə yaranan mübahisə zamanı Fərid həyat yoldaşına əvvəlcə yumruq, daha sonra isə ayaq zərbələri endirib. Hadisədən sonra onun barəsində Cinayət Məcəlləsinin qəsdən sağlamlığa zərər vurma maddəsi ilə cinayət işi açılıb.
Lakin Biləsuvar Rayon Məhkəməsində aparılan araşdırma zamanı məlum olub ki, tərəflər barışıblar. Zərərçəkmiş Sevil də ərinə qarşı şikayətini geri götürüb.
Məhkəmə bu amili nəzərə alaraq Fərid barəsində ittihamedici hökm çıxarmayıb. Cinayət Məcəlləsinin 73.2-ci maddəsinə əsasən cinayət təqibinə xitam verilib və o, cinayət məsuliyyətindən azad olunub.
Qeyd edək ki, adlar şərtidir.
Mənbə: demokrat.аz
