Şirvan Apellyasiya Məhkəməsində əzab vermədə təqsirləndirilən Əkbər Namazov barəsindəki hökmdən verilmiş apellyasiya şikayəti üzrə məhkəmə iclası başa çatıb və qərar elan olunub.
Məhkəmə araşdırması zamanı müəyyən edilib ki, Əkbər Namazov 2007-ci ildə Mehriban Namazova ilə ailə həyatı qurub və birgə yaşadıqları dövrdə ona qarşı mütəmadi fiziki və psixoloji zorakılıq tətbiq edib. O, müxtəlif vaxtlarda həyat yoldaşını döyərək və digər zorakı hərəkətlərlə zərərçəkmişə güclü fiziki ağrı və psixi iztirablar yaşadıb.
İttihama görə, 2020-ci ildə Masallı rayonunda yerləşən mənzildə qadına məxsus daşınmaz əmlakların onun adına keçirilməməsini bəhanə edərək azyaşlı övladlarının gözü qarşısında Mehriban Namazovanın baş və alın nahiyələrinə yumruq zərbələri endirib. Nəticədə zərərçəkmiş yüngül dərəcəli bədən xəsarəti alıb. 2021-ci ildə isə eyni səbəblə ona tərəf şüşə qab ataraq sağ əlin barmağında kəsilmiş yara ilə nəticələnən xəsarət yetirib.
İstintaq materiallarına əsasən, təqsirləndirilən şəxs sonrakı dövrlərdə də qadını mütəmadi təhqir edib, saçını dartmaq, barmaqlarını sıxmaq, yumruq və təpik zərbələri endirmək kimi zorakı hərəkətləri davam etdirib. Sonuncu dəfə 2024-cü ildə zərərçəkmiş şəxsin çox pul qazanmasını, lakin ailəyə az vəsait verməsini bəhanə edərək azyaşlı övladının gözü qarşısında Mehribanı yumruq və təpik zərbələri ilə döyüb, onu itələyərək yerə yıxıb.
Masallı Rayon Məhkəməsinin hökmü ilə o, 2 il azadlıqdan məhrum edilmişdi. Apellyasiya instansiyası cəzanı ağırlaşdıraraq 3 ilə qaldırıb, lakin "Konstitusiya və Suverenlik İli" ilə bağlı amnistiya tətbiq edilərək cəza 6 ay azaldılıb və qəti olaraq 2 il 6 ay müddətinə azadlıqdan məhrumetmə saxlanılıb. Qeyd edək ki, ad və soyadlar şərtidir.
