Lənkəran Ağır Cinayətlər Məhkəməsində xüsusi amansızlıqla qətldə təqsirləndirilən Təhmasib Əliyevin cinayət işi üzrə hökm elan edilib.
İttihama görə, hadisə Cəlilabad rayonunda baş verib. Təhmasib Əliyev qardaşının həyat yoldaşı Rəviyyə Nərmanova ilə həyətdə yaranmış mübahisədən sonra qadından qisas almaq qərarına gəlib. Mübahisə zamanı zərərçəkmişin onu və mərhum atasını təhqir etməsi təqsirləndirilən şəxsin narazılığına səbəb olub.
İstintaqla müəyyən edilib ki, həmin gecə spirtli içki qəbul edən Təhmasib Əliyev qatlanan bıçaq götürərək açıq pəncərədən evə daxil olub. Otaqda yatmış qadın yaranan səsə oyansa da, qaranlıq olduğundan qarşısındakı şəxsi həyat yoldaşı hesab edib.
Bundan istifadə edən təqsirləndirilən şəxs əvvəlcə qadının boğazından tutub, daha sonra ona çoxsaylı bıçaq zərbələri endirib. Məhkəmə-tibb ekspertizasının rəyinə əsasən, Rəviyyə Nərmanovaya ümumilikdə 74 bıçaq xəsarəti yetirilib, onlardan 6-sı həyat üçün təhlükəli ağır xəsarətlər olub. Qadın aldığı xəsarətlərdən hadisə yerində ölüb.
Məhkəmədə ifadə verən Təhmasib Əliyev əməlini etiraf edərək bildirib ki, təhqirlərdən sonra əsəbiləşib, gecə yata bilməyib və qisas məqsədilə bu cinayəti törədib. O, hadisə zamanı sərxoş olduğunu, neçə zərbə vurduğunu xatırlamadığını deyib və peşman olduğunu bildirib.
Zərərçəkmişin hüquqi varisi olan bacısı isə hadisədən əvvəl ailə daxilində ciddi mübahisələrin yaşandığını, bacısına ölüm hədələri edildiyini söyləyib.
Məhkəmənin hökmü ilə Təhmasib Əliyev 18 il 6 ay müddətinə azadlıqdan məhrum edilib.
