Biləsuvarda bir neçə yaşayış evindən oğurluq etməkdə təqsirləndirilən şəxsə hökm oxunub.
Məhkəmə materiallarına əsasən, o, 2025–2026-cı illərdə rayonun Zəhmətabad və Bağbanlar kəndlərində yerləşən fərdi yaşayış evlərinə gecə saatlarında hasardan aşaraq daxil olub. Pəncərələri dəmir parçası ilə açan şəxs evlərdən qızıl-zinət əşyaları, 1100 manat nağd pul, elektrik naqilləri, "BT-2500" markalı kondisioner, samovar, eləcə də yuyucu vasitələr və digər məişət əşyalarını oğurlayıb.
Nəticədə zərərçəkmişlərə ümumilikdə minlərlə manat maddi ziyan dəyib. Oğurlanan əşyalar arasında 585 əyarlı qızıl boyunbağı və üzük də olub.
Təqsirləndirilən şəxs məhkəmədə özünü qismən təqsirli bilib. O deyib ki, boşandıqdan sonra maddi vəziyyəti ağırlaşıb, himayəsində iki azyaşlı övladı var, hər ay aliment ödəyir və yalnız günəmuzd fəhlə kimi çalışır. Onun sözlərinə görə, məhz maddi çətinliklər səbəbindən oğurluq edib. Biləsuvarda yaşayan valideynlərini ziyarət edərkən bu cinayətləri törətdiyini də etiraf edib.
Məhkəmə onu təkrar oğurluq və yaşayış sahəsinə qanunsuz daxil olmaqla oğurluq etməkdə təqsirli bilərək 2 il 9 ay müddətinə azadlıqdan məhrum edib.
Mənbə: qaynarinfo.аz
