Lənkəran Ağır Cinayətlər Məhkəməsi Cəlilabadda törədilən qətllə bağlı İbrahim Babayevə 10 il azadlıqdan məhrumetmə cəzası verib.
İttihama görə, hadisəyə səbəb təqsirləndirilən şəxsin bacısının Firuz Baxşizadə ilə "WhatsApp" yazışmalarının ailəsində münaqişə yaratması olub. Məsələni aydınlaşdırmaq üçün Bakıdan Cəlilabada gələn İbrahim əvvəlcə Firuzun əmisi Azər Baxşiyevlə əlaqə saxlayaraq Firuzu görüşə gətirməsini istəyib. Azər buna əməl etmədikdən sonra İbrahim onu öldürmək qərarına gəlib, bazardan qatlanan cib bıçağı alıb və görüşə yollanıb.
2026-cı il fevralın 16-da Uzuntəpə kəndindəki evdə Azərlə görüş zamanı İbrahim bıçaqla onun sinəsinə bir zərbə endirib. Ürək nahiyəsindən aldığı ağır xəsarət nəticəsində Azər Baxşiyev hadisə yerində ölüb.
Məhkəmədə İbrahim Babayev qəsdən adam öldürmə ittihamını qismən qəbul edib. O bildirib ki, məqsədi öldürmək yox, Azəri vurmaq olub. Onun sözlərinə görə, Azərin ayağına zərbə endirmək istəyərkən bıçaq təsadüfən sinəsinə dəyib. Təqsirləndirilən şəxs hadisədən sonra 102 xidmətinə özü zəng etdiyini, əməlindən peşman olduğunu deyib.
Zərərçəkmiş tərəf isə məhkəmədə bildirib ki, mübahisəni böyüklərin iştirakı ilə sülh yolu ilə həll etmək üçün görüş təşkil edilmişdi və təqsirləndirilən şəxslə barışmayaraq ondan şikayətçi olduqlarını vurğulayıb.
Mənbə: Pravda.az
