Azərbaycanda dəhşətli hadisə baş verib. Ağcabədi rayonunda 7 yaşlı oğlan uşağına 19 bıçaq xəsarəti yetirilib.
Cenublu.az ölkə mediasına istinadən xəbər verir ki, hadisə rayonun Aşağı Avşar kəndində baş verib. 2019-cu il təvəllüdlü azyaşlı bədənin müxtəlif nahiyələrindən çoxsaylı kəsilmiş və deşilmiş yaralarla Ağcabədi Rayon Mərkəzi Xəstəxanasına yerləşdirilib. Xəstəxanadan verilən məlumata görə, azyaşlı ötən gün saat 18:00 radələrində Təcili tibbi yardım şöbəsinə gətirilib və dərhal əməliyyat olunub. Hazırda uşağın vəziyyəti orta-ağır olaraq qiymətləndirilir və müalicəsi Reanimasiya şöbəsində davam etdirilir.
Daxili İşlər Nazirliyinin (DİN) Mətbuat Xidmətinin Bərdə regional qrupundan verilən məlumata görə, hadisəni törətməkdə şübhəli bilinən şəxsin müəyyən edilməsi üçün polis əməliyyat tədbirləri keçirib. Araşdırmalar nəticəsində hadisəni törətməkdə şübhəli bilinən yetkinlik yaşına çatmayan bir nəfər müəyyən edilib. Hazırda faktla bağlı əlavə araşdırmalar davam edir.
Azyaşlının atası Rəşad Bəşirov bildirib ki, hadisə evlərinin yaxınlığında baş verib. O, uşağının oyun oynayarkən kimlərsə tərəfindən çağırıldığını və sonradan bıçaqlanaraq yaralandığını qeyd edib. Atası hadisəni törətməkdə şübhəli bilinən şəxsin dayısı ilə dost olduğunu vurğulayıb.
Bıçaqlanan şagirdinin 1-ci sinfində təhsil aldığı Ağcabədi rayonu Avşar kənd məktəbinin direktoru Elşən Quliyev isə əlavə edib ki, uşaq bıçaqlananda digər qardaşı da yanında olub.
Hadisə ilə bağlı hüquq-mühafizə orqanları tərəfindən araşdırma davam edir.
Qeyri-rəsmi mənbələrin bildiridiyinə görə, hadisəni törətməkdə şübhəli bilinən yeniyetmənin 12 yaşı var.
