Şirvan Apellyasiya Məhkəməsi Astara şəhərində xuliqanlıqda təqsirləndirilən Malik İmanov və həyat yoldaşı Məleykə İmanovanın işi üzrə qərarını açıqlayıb.
Hadisə 2025-ci ildə Astara şəhərində, "Gənclər Palace" şadlıq sarayının qarşısında baş verib. İstintaqa görə, Malik övladı ilə yolu keçərkən tanışı Fərəc Vəliyevin idarə etdiyi avtomobilin onların üzərinə sürüldüyünü və ünvanına nalayiq ifadələr işləndiyini iddia edib.
Sonra tərəflər yenidən qarşılaşanda Malik nalayiq ifadələr işlədərək Fərəcin üzünə yumruq vurub, daha sonra isə onun avtomobilinə təpiklə zərbələr endirib. Nəticədə zərərçəkmişə xəsarət yetirilib, avtomobilə isə 320 manat ziyan dəyib.
İttihama görə, Məleykə də digər zərərçəkmiş Habil Ömərova təpiklə xəsarət yetirib və avtomobilə əlavə 40 manatlıq ziyan vurub. Təxminən 5 dəqiqə davam edən insident ictimai qaydanın kobud şəkildə pozulmasına səbəb olub.
İlk instansiya məhkəməsi ər-arvada 3 il azadlığın məhdudlaşdırılması cəzası vermişdi. Məhkəmə dövlət ittihamçısının protestini təmin edərək Malik İmanova verilmiş azadlığın məhdudlaşdırılması cəzasını bir il müddətinə azadlıqdan məhrumetmə ilə əvəz edib. O, qərardan dərhal sonra məhkəmə zalında həbs edilib.
Ad və soyadlar şərtidir.
Mənbə: Pravda.az
