Salyanda sürücünü döyərək ona bədən xəsarətləri yetirməkdə təqsirləndirilən şəxslə bağlı məhkəmə prosesi başa çatıb.
Hadisə Salyan şəhəri, M.Dadaşov küçəsində yerləşən fərdi yaşayış evinin qarşısında baş verib. İttihama görə, zərərçəkmiş İntiqam Amalov (adı, soyadı şərtidir) hadisə günü Famil Ömərovun həyat yoldaşını onun işlədiyi mağazadan götürərək avtomobillə yaşadığı ünvana gətirib. Təqsirləndirilən şəxs əvvəllər də zərərçəkmişdən yoldaşını birbaşa evlərinin qarşısında deyil, şadlıq sarayının yaxınlığında düşürməsini xahiş edib. Onun fikrincə, qadının hər dəfə evin qarşısında avtomobildən düşməsi ətrafda əsassız söz-söhbətlərin yaranmasına səbəb ola bilərdi. Lakin hadisə günü İntiqam Amalov yenidən qadını yaşadığı evin qarşısında düşürdüyü üçün tərəflər arasında mübahisə yaranıb.
Münaqişə zamanı sürücüyə yumruq zərbəsi endirilib.
Məhkəmə-tibbi ekspertizasına əsasən, zərərçəkənin burnu sınıb, həmçinin üz nahiyəsində qançırlar aşkarlanıb.
Şirvan Apellyasiya Məhkəməsinin qərarı ilə zərərçəkmiş şəxslə barışıq əldə olunduğu üçün cinayət təqibinə xitam verilib və təqsirləndirilən şəxs cinayət məsuliyyətindən azad olunub.
Mənbə: pravda.az
