Masallının Böyük Kolatan kəndində Ağdam sakini Kamran Pənahov şizofreniya xəstəliyindən əziyyət çəkən şəxsi qeyri-tibbi üsulla, yəni dua yazmaqla müalicə edəcəyini vəd edərək onun qardaşından 5000 manat pul alıb.
Məlumata görə, xəstə uzun müddət tibbi müalicə alsa da, müsbət nəticə əldə olunmayıb. Bundan istifadə edən Kamran Pənahov onu sağaldacağına dair yalan vəd verərək pulu mənimsəyib. Faktla bağlı Cinayət Məcəlləsinin dələduzluq maddəsi ilə cinayət işi başlanıb.
Masallı Rayon Məhkəməsində keçirilən iclasda təqsirləndirilən şəxs hadisə zamanı qəbul etdiyi dərmanların təsiri altında olduğunu və baş verənləri tam xatırlamadığını bildirib. O, zərərçəkmişə dəymiş 5000 manat ziyanı tam ödədiyini deyib.
Zərərçəkmiş də ifadəsində dəymiş ziyanın ödənildiyini təsdiqləyərək cinayət işinə xitam verilməsinə etiraz etmədiyini bildirib.
Məhkəmənin qərarı ilə təqsirləndirilən şəxs cinayət məsuliyyətindən azad edilib, onun barəsində aparılan cinayət təqibinə xitam verilib.
Soyad şərtidir.
