Astaranın Kolatan kəndində qayınanasını qətlə yetirməkdə ittiham olunan 22 yaşlı Ruhanə İmanova barədə məhkəmə araşdırması başa çatıb.
Məlum olub ki, hadisə gözlənilməz səbəbdən – gəlinin dişlərinə breket taxdırması ilə bağlı yaranan mübahisədən başlayıb. 55 yaşlı qayınana Xalidə Manafova buna qarşı çıxıb və tərəflər arasında mübahisə böyüyüb. Nəticədə Ruhanə qayınanasını bıçaqlayaraq qətlə yetirib.
Ruhanə məhkəmədə özünü təqsirli bilib və peşman olduğunu deyib. O bildirib ki, 4 il ərzində qayınanası ilə münasibətləri gərgin olub və tez-tez mübahisələr yaşanıb. Onun sözlərinə görə, qayınanası ona məhdudiyyətlər qoyur, hətta çimməsi üçün cəmi 5 dəqiqə vaxt verirmiş. Son mübahisə zamanı isə qayınananın həm ona, həm də 8 aylıq körpəsinə qarşı təhqiramiz ifadələr işlətməsi Ruhanəni özündən çıxarıb.
İş materiallarında qeyd olunub ki, hadisədən sonra qadın əvvəlcə qayınanasının ölümünü intihar kimi göstərməyə çalışıb və həyat yoldaşına da bu cür məlumat verib. Lakin polis tərəfindən saxlanıldıqdan sonra törətdiyi əməli etiraf edib.
Məhkəmədə mərhumun oğulları da ifadə verib. Ruhanənin əri hadisəni təsdiqləyərək bildirib ki, anası ilə həyat yoldaşı arasında mübahisələr mütəmadi xarakter daşıyıb. O, həmçinin həyat yoldaşının belə bir cinayət törətməsindən təəssüfləndiyini deyib.
İlkin olaraq Ruhanəyə xüsusi amansızlıqla adam öldürmə maddəsi ilə 14 ildən 20 ilə qədər həbs cəzası tələb olunurdu. Lakin Lənkəran Ağır Cinayətlər Məhkəməsi bu ittihamı düzgün hesab etməyib və əməli qəsdən adam öldürmə kimi qiymətləndirib. Məhkəmə kollegiyası hesab edib ki, vurulan zərbələr xüsusi qəddarlıq niyyəti ilə deyil, öldürmə məqsədilə yetirilib. İki azyaşlı uşağın anası olması da nəzərə alınaraq Ruhanəyə 10 il həbs cəzası verilib.
