İmişli rayonunda 25 yaşlı kişi yetkinlik yaşına çatmayan qıza qarşı intim hərəkətlər edib.
Hadisə ötən il oktyabrın 1-də İmişli şəhərində baş verib.
Sərxan 2010-cu il təvəllüdlü Samirə ilə "WhatsApp" qrupunda tanış olub. 2025-ci ilin iyunundan etibarən yazışaraq yaxınlaşıblar və aralarında sevgi münasibəti yaranıb. Sərxan ifadəsində qızın yaşını, hətta onun 31 dekabrda 15 yaşını tamamlayacağını da bildiyini deyib. Buna baxmayaraq, o, Samirəyə qoşulub qaçmağı təklif edib və qız razılaşıb.
Məhkəmə materiallarına görə, plan üzrə 1 oktyabr gecəsi Samirə anası yatdıqdan sonra evdən çıxıb. Sərxan əvvəlcədən dayısına məxsus boş evin açarlarını götürüb və qızı gözləyib.
Onlar gecə saatlarında görüşərək həmin evə gediblər. İfadəyə əsasən, evin yataq otağında əvvəl söhbət ediblər, daha sonra isə intim münasibətdə olublar və qızın bakirəliyi pozulub. Samirə həmin vaxt anasına mesaj yazaraq "öz xoşumla qaçmışam" deyə məlumat verib.
Səhər qızın evdə olmadığını görən anası narahat olaraq yaxınlarına və polisə xəbər verib. Daha sonra Sərxanın qohumu Tahir onları görərək Samirənin polis tərəfindən axtarıldığını bildirib. Bundan sonra Sərxan qızı evinə qaytarıb, özü isə polis tərəfindən saxlanılıb.
Məhkəmədə Sərxan ittiham üzrə özünü təqsirli bilib, əməlindən peşman olduğunu və gələcəkdə Samirə ilə evlənmək niyyətində olduğunu deyib. Zərərçəkmiş tərəf və onun qanuni nümayəndəsi şikayətçi olmadıqlarını, tərəflər arasında barışıq əldə edildiyini bildiriblər.
İmişli Rayon Məhkəməsinin hökmü ilə Sərxan Cinayət Məcəlləsinin 152.1-ci maddəsi ilə təqsirli bilinib. Ona 1 il 6 ay azadlığın məhdudlaşdırılması cəzası təyin olunub, lakin Cinayət Məcəlləsinin 70-ci maddəsi tətbiq edilərək cəza şərti hesab olunub və 1 il sınaq müddəti müəyyən edilib.
