İçməli su təchizatının yaxşılaşdırılması üçün görülən tədbirlər sayəsində Yardımlı rayon mərkəzinin su və kanalizasiya problemi həll edilib.
“Azərbaycan” qəzetinin Rayon Statistika İdarəsindən aldığı məlumata görə, cari ilin əvvəlində Yardımlı şəhərində mərkəzləşdirilmiş su təchizatına qoşulan ev təsərrüfatlarının sayı 2478, kanalizasiya sisteminə qoşulan ev təsərrüfatlarının sayı 343 olub. Suyun saxlanıldığı rezervuarların sayı 10, magistral boru və küçə su kəmərlərinin, məhəllə və həyətdaxili şəbəkələrin uzunluğu 74,2 kilometr, o cümlədən magistral boru kəmərlərinin uzunluğu 4,8, küçə su kəmərləri, məhəllə və həyətdaxili şəbəkələr üzrə kəmərlərin uzunluğu isə 69,4 kilometrdir.
Məlumatda daha sonra bildirilir ki, təmizləyici qurğuların müəyyən edilmiş istehsal gücü sutkada 1,2 min kubmetrdir. Ötən il təbii su mənbələrindən şəhər mərkəzləşdirilmiş su təchizatı sistemlərinə öz axını ilə 326,5 min kubmetr su verilib. Bütün istehlakçılara verilmiş 278 min kubmetr sudan 257,4 min kubmetri əhalinin, 20,6 min kubmetr digər istehlakçıların təminatına sərf edilib.
Hazırda rayon mərkəzində istehlakçılar gün ərzində 24 saat yüksəkkeyfiyyətli içməli su ilə təmin olunurlar.
