Lənkəranda novruz bayramı ərəfəsində bazarlarda bəzi ərzaq məhsullarının, xüsusilə də balığın qiymətində artım müşahidə olunur.
Cenublu.az xəbər verir ki, daha çox tələbat olan kütüm balığının qiyməti isə alıcıların narazılığına səbəb olub. Satıcılar artımın səbəbini həm hava şəraiti, həm də bayramla bağlı yüksələn tələbatla izah edirlər.
Adi günlərdə 1 kiloqramı 15 manata satılan yerli kütüm balığı indi 30-35 manata, hətta daha yüksək qiymətə təklif olunur.
Tələbat çox olduğu üçün bazarlarda qonşu ölkələrdən idxal olunan kütüm balıqlarına da rast gəlinir. Satıcıların sözlərinə görə, onların qiymətində də artım müşahidə olunsa da, yerli məhsullarla müqayisədə 2-3 manat ucuzdur.
Alıcılar da bu il bazarda balığın qiymətinin artımını təsdiqləyirlər. Amma adət-ənənəyə uyğun olaraq süfrələrdə balığın olmasını vacib olduğunu deyirlər. Bazarlardakı qiymət amili isə adətən, tələbat-təklif nisbəti ilə tənzimlənir.
Mütəxəssislər deyirlər ki, qiymət artımı qısamüddətli xarakter daşıyır. Havaların nisbətən isinməsi ilə bazara daxil olan balıqların həcminin artması qiymətlərin də stabilləşməsinə səbəb olacaq.
