Lənkəran şəhərində yeni kanalizasiya sisteminin inşasına 200 milyon manat vəsait ayrılıb. Bu barədə şəhər icra başçısı Taleh Qaraşov anews.az-a açıqlamasında məlumat verib.
Cenublu.az xəbər verir ki, Qaraşovun sözlərinə görə, mövcud sistem təxminən 50 il əvvəl inşa edilib və artıq şəhərin artan ehtiyaclarını qarşılamır. O qeyd edib ki, hazırda yol kənarındakı xəndəklər kanalizasiya kimi istifadə olunur, halbuki onlar yalnız yağış sularının axıdılması üçün nəzərdə tutulub və antisanitariya mənbəyinə çevrilib.
İcra başçısı bildirib ki, layihə Dövlət Su Ehtiyatları Agentliyi tərəfindən maliyyələşdirilir və 4 mərhələdə – hər il 50 milyon manat olmaqla həyata keçiriləcək.
Yeni sistemin uzunluğu 210 kilometr olacaq və yalnız Lənkəran şəhərinin ehtiyaclarını qarşılayacaq. Layihə çərçivəsində Xəzər dənizində su təmizləyici qurğunun tikintisi də planlaşdırılır.
Tikinti işlərinə yaxın günlərdə başlanacaq, layihənin 2029-cu ilin dekabrında tam başa çatdırılması nəzərdə tutulur.
