Mərkəzi Bank Lənkəran-Astara iqtisadi rayonu üzrə orta kredit faizlərini açıqlayıb. Bu haqda bu gün, 2 sentyabr tarixində Cenublu.az xəbər verir.
İqtisadi rayonda illik faiz 18.65% təşkil edir. Orta faiz hesablanan zaman bura yalnız istehlak kreditləri deyil, eyni zamanda bütün növ biznes borclanması da daxildir. Buna görə də istehlak kreditləri üzrə orta faiz dərəcəsi daha yüksəkdir.
İqtisadçı-ekspert Vüqar Bayramov bildirib ki, rayonlarda orta faizlərin yüksək olması ümumi kredit portfelinin strukturunda biznes kreditlərinin payının az olması ilə bağlı olsa da, regionlarda yüksək faizlər daha çox borclanma yaradır. Həmçinin biznesə sərmayə qoyuluşunun artırılması üçün ucuz kredit alətindən daha çox istifadə olunması vacibdir.
Ümumi kredit portfelinin də 80 faizə yaxını paytaxtın payına düşür. Bu da bölgələrdə kredit qoyuluşlarının Bakı ilə müqayisədə xeyli az olduğundan xəbər verir.
Vüqar Bayramov qeyd edir ki, Mərkəzi Bank tərəfindən kredit portfelində və faizlərində regional disbalansın azaldılması və eləcə də bank sektorunda rəqabətin gücləndirilməsi ilə bağlı sistemli və daha ünvanlı tədbirlərin genişləndirilməsinə ehtiyac var.
Qeyd edək ki, orta kredit faizinin ən aşağı olduğu yer Bakı (10.68%) və Naxçıvandır (13.04%).
