Hindistanın Azərbaycandakı səfiri Abhay Kumar ölkənin cənub bölgəsinə səfəri çərçivəsində Lənkəran və Lerik rayonlarında bir sıra görüşlər keçirib.
Səfirlikdən apa.az-a verilən məlumata görə, səfərin məqsədi Hindistan və Azərbaycan arasında mədəniyyət, sağlamlıq, kənd təsərrüfatı və ətraf mühit sahələrində əməkdaşlığın inkişaf etdirilməsi olub.
Səfir əvvəlcə Lənkəran Tarix-Diyarşünaslıq Muzeyini ziyarət edib. Muzeyin direktoru Leyla Məcidova ilə görüş zamanı ona bölgənin zəngin tarixi-mədəni irsi və muzeyin bu irsin qorunmasındakı rolu barədə məlumat verilib.
Səfər çərçivəsində Yenee Wellness Centerdə olan diplomat mərkəzin baş həkimi Emil Hidayətli ilə görüşüb. Tərəflər Azərbaycanda ayurveda, yoqa və holistik sağlamlıq təcrübələrinin təşviqi imkanlarını müzakirə ediblər. Görüşdə Beynəlxalq Yoqa Günü ərəfəsində sağlam həyat tərzinin təşviqinin əhəmiyyəti vurğulanıb.
Abhay Kumar Lənkərandakı yaşıl çay plantasiyasını da ziyarət edərək müəssisənin sahibi və direktoru Araz Yaqubov ilə görüşüb. Görüş zamanı bölgənin çayçılıq ənənələri, müasir becərmə üsulları və çay istehsalının yerli kənd təsərrüfatındakı rolu barədə fikir mübadiləsi aparılıb. Tərəflər Hindistan və Azərbaycanın ortaq çay mədəniyyətini vurğulayaraq bu sahədə əməkdaşlıq və təcrübə mübadiləsinin genişləndirilməsi imkanlarını nəzərdən keçiriblər.
Səfir həmçinin Hirkan Milli Parkı və Xanbulan gölünü ziyarət edərək bölgənin bioloji müxtəlifliyi və təbii irsi ilə tanış olub. Səfər zamanı ərazinin ekoloji əhəmiyyəti və təbiətin qorunmasının vacibliyi diqqətə çatdırılıb.
Lerik rayonunda isə diplomat Uzunömürlülük Muzeyini ziyarət edib. Muzeyin baş kuratoru Mətanət Quliyeva qonağa muzeyin eksponatları və Lerikin uzunömürlülük ənənələri barədə məlumat verib. Talış dağlarında yerləşən rayonun beynəlxalq səviyyədə "Uzunömürlülər Diyarı" kimi tanındığı qeyd olunub.
Səfərin yekununda Abhay Kumar göstərilən qonaqpərvərliyə görə minnətdarlığını ifadə edib. O, mədəniyyət, sağlamlıq, dayanıqlı kənd təsərrüfatı, ekoturizm və ətraf mühitin mühafizəsi sahələrində Hindistan ilə Azərbaycan arasında əməkdaşlığın və insanlararası əlaqələrin daha da genişlənəcəyinə ümidvar olduğunu bildirib.
