Astara rayonunda muzdla çalışan işçilərin sayında artım müşahidə edilib. Bu haqda bu gün, 10 avqust tarixində Cenublu.az Azərtac-a istinadən xəbər verir.
Cari il 1 iyul tarixinədək muzdla çalışan işçilərin sayı ötən ilin eyni dövrü ilə müqayisədə 123 nəfər artaraq 8.461 nəfər olub. Verilən rəqəmlərdən 6.207 nəfəri dövlət sektorunda, 2.254 nəfəri isə qeyri-dövlət sektorunda fəaliyyət göstərib.
Verilən məlumata əsasən, muzdla çalışanların 41,5% təhsil, 20% ticarət, 5,0% sənaye, 11,5% əhaliyə səhiyyə və sosial xidmətlərin göstərilməsi, 0,9% tikinti, 5% dövlət idarəetməsi və müdafiə; sosial təminat, 4,4% nəqliyyat və anbar təsərrüfatı, 3,3% kənd təsərrüfatı, meşə təsərrüfatı və balıqçılıq, 0,6% peşə, elmi və texniki fəaliyyət, 0,2% maliyyə və sığorta fəaliyyəti, 7,6% isə iqtisadiyyatın digər sahələrində məşğul olub.
Astara Rayon Statistika İdarəsinin rəisi Vasif Həsənov bildirib ki, işçilərin orta aylıq nominal əməkhaqqı əvvəlki ilin müvafiq dövrünə nisbətən 20,1% artaraq 528,7 manat olub.
