Astara rayonunda magistral yolun kənarında yaranan antisanitar vəziyyət narazılıq doğurur.
Cenublu.az xəbər verir ki, köhnə Ələt-Astara magistral yolunun Telman kəndindən keçən hissəsində yolboyu boş ərazi sakinlər tərəfindən məişət tullantıları ilə doldurulub. Nəticədə həmin ərazi açıq zibil poliqonunu xatırladır.
Qeyd edək ki, yaşayış evləri ərazidən nisbətən uzaqda yerləşsə də, bu yoldan hər gün çoxsaylı yerli sakin və rayona gələn qonaqlar istifadə edir. Yol kənarında yaranan bu xoşagəlməz mənzərə isə həm ətraf mühitə, həm də rayonun ümumi görüntüsünə ciddi mənfi təsir göstərir.
Məlumata görə, zibillənən sahə kənd qəbiristanlığının yaxınlığında yerləşir. Burada kəskin qoxu hiss olunur, əraziyə atılan plastik, məişət tullantıları və digər çürüməyən materiallar vəziyyəti daha da ağırlaşdırır. Hətta bəzi nöqtələrdə ölü heyvan qalıqlarına da rast gəlinir.
Bildirilir ki, bir müddət əvvəl ərazi tam təmizlənmək əvəzinə, tullantıların üstü torpaqla örtülüb. Lakin sonradan həmin hissə yenidən zibillə doldurulub.
Şikayətçilər aidiyyəti qurumlardan məsələyə müdaxilə etməyi və əraziyə nəzarəti gücləndirməyi xahiş edirlər.
