Xorvatiyanın paytaxtı Zaqreb şəhərində cüdo üzrə dünya çempionatında idmançımız gümüş medal əldə edib. Bu haqda məlumatı Cenublu.az bu gün, 24 avqust tarixində verir.
Yarışlarda Azərbaycanı 12 çəki dərəcəsində 13 oğlan və 5 qız cüdoçu təmsil edir.
Dünya çempionatının ilk günündə 6 cüdoçumuz tatamiyə çıxıb. -50 kq çəki dərəcəsində yarımfinalda cüdoçularımız Məhəmməd Məmişov gürcüstanlı idmançı Şota Baçoşviliyə, Nihad Məmişov isə qazaxıstanlı idmançı Nurbol Askara qalib gəliblər. Finalda cüdoçularımız bir-biriləri ilə qarşılaşıblar və Nihad Məmişov dünya çempionatının qızıl, Məhəmməd Məmişov isə gümüş medalına sahib olub.
Qeyd edək ki, Məhəmməd Asif oğlu Məmişov əslən Masallı rayonunun Təzə Alvadı kəndindəndir. 17 yaşlı idmançımız Türkiyədə, Gürcüstanda, Rusiyada və ayrı-ayrı ölkələrdə təşkil olunan beynəlxalq yarışlardan Vətənə qızıl və gümüş medallarla dönüb. İspaniyanın Malaqa şəhərində yeniyetmələr arasında keçirilən açıq Avropa turnirində Məhəmməd Məmişov (50 kq) rəqiblərini məğlub edərək birinciliyi qazanıb. Fransanın Strasburq şəhərində kadetlər arasında Avropa kuboku yarışında bürünc, may ayında isə Rumıniyanın paytaxtı Buxarest şəhərində yeniyetmələr arasında Avropa kuboku yarışında gümüş medala sahib olub. Xorvatiyanın Poreç şəhərində yeniyetmə idmançılar arasında keçirilən Avropa çempionatında bürünc medal qazanıb. Qitə çempionatında üçüncü yer uğrunda görüşdə ermənistanlı Qor Safaryanı üstələyən Məmişov rəqibini 25 saniyəyə məğlubiyyətə uğradıb. Portuqaliyanın Odivelas şəhərində cüdo üzrə yeniyetmələr arasında Avropa çempionatının qızıl medalını qazanıb.
